في 2012 بدأت رحلتي مع التعليم والمدارس: عبد الله اول اطفالي هيدخل كي جي 1. بدأت ادور على المدارس اللى اعتقدت وقتها انها بتقدم تعليم ذو جودة ومدرسين أكفاء مع عدم نسيان الجانب المرح عشان شغفه وحبه للتعليم يزيد. اتصلت بأكتر من مدرسة واخدت مواعيد عشان مقابلة كي جي1. قرايبي واخواتي قالولى لازم يكون مستعد للمقابلة. قعدت جادلت شوية انه داخل كي جي 1 ومتكبروش الموضوع طبعا لإني كنت ساذجة جدا في الوقت ده.
اول انترفيو رفضونا قالتلي الولد مش عارف الحروف والألوان ولا الأرقام ولا الحيوانات ولا الاشكال ولا بيعرف يكتب اسمه. قلتلها يا فندم ما هو عارفهم ماعدا يكتب اسمه ده يتعلمه في المدرسة ان شاء الله قالتلي عارفهم بالعربي بس المفروض يعرفهم انجلش كمان. واضح انكم بتكلموه عربي في البيت قلتلها ايوه الست اتعصبت جدا قالتلى ايوه ازاي حرام عليكم مستقبله هيضيع انصحك تهتمي بإبنك اكتر من كدا رديت قلتلها ماهو انا مهتمه بيه جدا واهو جايباه اغلى مدرسة عشان تعلموه طبعا تم رفضي.
المعاد اللي بعده قررت احفظ الولد الأرقام والألوان وشوية حيوانات واشكال وخلاص بقينا مستعدين ورحنا المقابلة وبرضه اترفضنا! برضه سألت بكل براءة ليه حضرتك رفضتينا احنا عارفين كل حاجة؟ قالتلى ابنك ميعرفش الخضروات والفواكه الا بالعربي ووريته صورة الخرشوف ومعرفوش ابنك عنده مشكلة. قلت لها هو ليه طفل عنده اقل من 5 سنوات لازم يعرف الخرشوف؟ ماله الموز ولا الخيار وطبعا اترفضنا.
رجعت البيت محبطه جدا ازاي فاتتني دي لازم اعرفه الخرشوف وبدينا نزود تعليم باقي الخضروات والفواكه. حسيت بسعادة الحمدلله عرفنا الخرشوف وزيادة تأكيد وريته البروكلي والحرنكش “عشان خاطري يا بني مستقبلك متوقف على الخرشوف”. المقابلة رقم 3 بنت عمي الدكتورة أسماء أصرت تيجي معايا. وصلنا المدرسة مبنى المدرسة متهالك بمعنى الكلمة ومصاريف المدرسة تكفي اني اجوزه وافتح له مشروع كمان. بنت عمي قالتلى انتي متاكدة انها المدرسة؟ قلتلها يمكن ده الى بيعملوا فيه المقابلات والمبنى الحقيقي في مكان تاني. بس الصدمه ان طلع مفيش مبنى تانى! دخلنا الانترفيو وبدأت اسأله غريبه عجيبة من عينة “ها عبدالله حافظ كم جزء؟” “ولاجزء طبعا!” ده كان ردي .مطت شفايفها بقرف وقالتلى ممممم طيب بيعرف يكتب إيه؟ خد اكتب يا عبدالله واديته ورقه وقلم. بنت عمي قالتلي انا هضربها قلتلها اصبري بس. يا مدام ابنك مبيعرفش يقرا ولا يكتب. بنت عمي قامت من مكانها وبدأت تتعصب حضرتك واعيه لكلامك هو داخل كي جي ون جايبينه نتعلم ليه المفروض يكون بيعرف يقرا ويكتب .الست بصيت لنا بمنتهى القرف وقالت جمله وجعتني جدا “الاشكال دي من الأولاد لا يمكن نقبلها في المدرسة ابنكم مبيعرفش يكتب”. انا قلتلها “ايه الاشكال دي ايه النقص اللى في الولد؟”. وبكل قلة ذوق قالت لنا المقابلة انتهت.
بنت عمي قالتلى دي لا يمكن تكون مدرسة، ده يعقدو الأطفال عندهم.
المقابلة رقم 4 بعد ماتخطينا صدمة المقابله رقم 3 استعدينا للمواجهة اكتر
بس كان ابني زهق وقرف، المدرسه رقم 4 قبل معاد المقابله بيوم اتصلت بيا توضح لي نظام المقابله ومدى صعوبتها وطبعا رسوم المقابله غير مسترده وان غالبا ابني هيترفض لانهم ويتنج ويتنج ليست ، قلتلها لاضرر من المحاولة
رحت المقابلة دخل ابني، اديته 4 ورقات 2 فيهم متاهة و2 توصيل نجح في التوصيل وأول متاهة وهوب عند تاني متاهة معرفش يوصل الفار انه ياكل حتة الجبنه لسه هساعده لان كانت المتاهه معقده جدا راحت الست بصت لي حتة بصه وبصوت جهوري جدا مدام مينفعش تساعديه سكت وللأسف ابني فشل انه يوصل الفار للجبنه، بس بكل براءه قلتلها يعني اكيد تعليمه مش هيقف عالفار ده ولاايه وضحكت ضحكة حزينه
بصت لي من طرف عنيها هنرد عليكي بكره.
رحت على بيت ماما وانا حزينه ومحبطه قالتلى بشريني يابنتي قلتلها الفار مأكلش الجبنة وقعدت اعيط وماما تضحك.
المقابلة رقم 5 يوم المقابلة الصبح ابني قالي ماما انا زهقت انا مش عاوز اروح مدرسة هفضل عند تيته. اقنعته انا وجدته بالعافية يقوم ينزل قالى مش هجاوب على أي سؤال يسألوه.
وصلنا المدرسة. دخلنا قالولي الولد لوحده من فضلك من غير الام بعد 10 دقايق طلعو الاتنين المسؤولات عن الانترفيو واحدة متعصبة جدا والتانية هتموت من الضحك ، اللى بتضحك تقولى ابنك سكر مالوش حل والتانية تقولى ابنك متخلف يامدام. طيب خير فهموني كدا نجح ولاسقط؟ في نفس الوقت واحدة قالت نجح والتانى سقط بعد شوية فهمت انها جابت له صورة سمكة مكنش راضي يرد عليها لأنه زهق ، بعدها رد قالها دي بقرة سألته بتعيش فين قالها عالشجرة. ووريته صورة عصفور قالها بيعيش فالبحر وبياكل جمبري، طبعا اقسمت لها انه “عارف السمكة كويس جدا وعارف البحر والله ده حتى انا امي اسكندرانية” بس مشيت خائبة الامل.
وصلت عند ماما وانا متعصبه من ابني جدا وأول ما وصلت حكيت لماما ولبنت عمي ولسه هتعصب على ابني ماما قالتلي ابنك زهق ووريته صورة سمكة وعصفور قالتله دي ايه ياحبيبي قالها سمكه ياتيته وبتعيش فين ياحبيبي في البحر طبعا يا تيته ولا عاوزاها تموت ، اتنرفزت منه وقلتله ومقلتش هناك ليه؟ قعد يضحك ويقول لجدته كانت ممله يا تيته
تانى يوم الصبح لقينا اتصال من المدرسة انهم وافقوا واني اجيب الأوراق وكدا.
رحت فورا ما صدقت وكلمت زوجي ابشره أخيراً الولد هيتعلم لأنه بحكم سفره المتكرر محضرش ولا مقابلة. لما وصلت المدرسة وبتمم الإجراءات لقيت مديرة المدرسة بتسألني “ليه والده مش موجود هو انتى منفصلة؟” قلتلها والده مسافر قالتلى عشان مبنحبش المشاكل وترجعو بعد كدا حد يقول الولد في حضانة مين فلازم والده يكون موجود. بعد الكثير من المحادثات مرجعتش للمدرسة تاني وحسيت انها مدرسة عقيمة فكريا اللى تحدد قبول الطفل بالمدرسة بتواجد الاب، طيب والأطفال الى أهلهم منفصلين او والدهم متوفي يعملوا ايه؟ كان زوجي بلغني انه راجع قريب وهيروح معانا المدرسة، لكن بصراحة سقطوا من نظري لأنهم بلا رحمة. المقابلة رقم 6 و7 و8 كان مصيرهم زي اللي سبقوهم.
…يتبع